ក្នុងរយៈពេល៦ខែនៃការវាយលុកប្រឆាំងនឹងរដ្ឋាភិបាលយោធាមីយ៉ាន់ម៉ា កងកម្លាំងប្រឆាំងបានទទួលជ័យជំនះច្រើន តែជនស៊ីវិលស្លាប់ច្រើនឡើងនៅពេលក្រុមទាហានរបបគ្រប់គ្រងយោធាបង្កើនកលយុទ្ធបំផ្លាញនិងសម្លាប់គ្មានត្រាប្រណីនៅក្នុងសង្គ្រាមស៊ីវិលដ៏ជូរចត់នៃប្រទេសនេះក្នុងអាស៊ីអាគ្នេយ៍។
មានសម្ពាធជុំទិសពីក្រុមជីវពលនៃក្រុមជនអំបូរភាគតិចនៃប្រទេសមីយ៉ាន់ម៉ានិងកងកម្លាំងតស៊ូថ្មីៗ។ ទាហានរដ្ឋាភិបាលបានសងសឹកដោយធ្វើការវាយប្រហារតាមអាកាស តាមសមុទ្រនិងដោយកាំភ្លើងធំលើមន្ទីរពេទ្យនិងកន្លែងឯទៀតៗដែលក្រុមប្រឆាំងអាចជ្រកកោនឬត្រូវជួយសង្គ្រោះ។
លោក Dave Eubank ជាអតីតទាហានកងកម្លាំងពិសេសសហរដ្ឋអាមេរិកដែលបានបង្កើតក្រុម Free Burma Rangers ជាអង្គការខាងជំនួយមនុស្សធម៌មួយផ្តល់ជំនួយដល់ក្រុមយុទ្ធជននិងក្រុមជនស៊ីវិលមីយ៉ាន់ម៉ាតាំងពីទសវត្សរ៍១៩៩០មក។ លោកបាននិយាយថា៖«នៅពេលមហាជនងើបឈរប្រឆាំងនឹងក្រុមយោធា ខ្ញុំយល់ថាការណ៍នេះនាំឱ្យពួកគេភ័យខ្លាច»។
នៅពេលនេះកងកម្លាំងយោធាត្រួតត្រាតិចជាងពាក់កណ្តាលប្រទេស តែកាន់កាប់រឹងមាំផ្នែកជាច្រើននៃតំបន់កណ្តាលប្រទេសមីយ៉ាន់ម៉ាមានរួមរដ្ឋធានីណៃពិដោ ដែលកាលពីពេលថ្មីៗនេះបានរងការវាយប្រហារដោយដ្រូន និងក្រុង Yangon ជាក្រុងធំបំផុតរបស់ប្រទេសនេះ។ កងយោធាក៏មានអាវុធច្រើនជាងកងកម្លាំងតស៊ូដោយសារមានការគាំទ្រពីរុស្ស៊ីនិងចិន។
លោក Thet Swe អ្នកនាំពាក្យរដ្ឋាភិបាលយោធាបានបដិសេធថាទាហានមិនបានវាយប្រហារលើអគារនិងតំបន់ដែលជនស៊ីវិលជ្រកកោនទេ ដោយលោកបានបន្ទោសក្រុមប្រឆាំងថាបានបំផ្ឡាញកន្លែងទាំងនេះ ដោយលោកមិនបានផ្តល់ភ័ស្តុតាងឡើយ។
នៅក្នុងការវិវត្តមួយទៀត របបយោធាមីយ៉ាន់ម៉ាកាលពីថ្ងៃពុធបានបដិសេធសំណើរបស់អតីតមេដឹកនាំកម្ពុជាលោក ហ៊ុន សែន ដែលចង់ជួបពិភាក្សាជាមួយមេដឹកនាំលទ្ធិប្រជាធិបតេយ្យលោកស្រីអោងសាន ស៊ូជី ដែលត្រូវបានឃុំខ្លួនតាំងពីរដ្ឋប្រហារឆ្នាំ២០២១។
របបយោធាបានច្រានចោលសំណើជាច្រើនរបស់មេដឹកនាំបរទេស និងអ្នកការទូតដើម្បីជួបម្ចាស់ជ័យលាភីណូបែលអាយុ ៧៨ ឆ្នាំ រូបនេះ ដែលត្រូវបានរាយការណ៍ថាមានបញ្ហាសុខភាពក្នុងអំឡុងពេលឃុំឃាំងជាងបីឆ្នាំមកនេះ។
កាលពីថ្ងៃអង្គារ លោក ហ៊ុន សែន ដែលបានគ្រប់គ្រងប្រទេសកម្ពុជាអស់រយៈពេលជិត៤ទសវត្សរ៍មុនពេលចុះចេញពីតំណែងកាលពីឆ្នាំមុន បានថ្លែងថា លោកបានស្នើសុំជួបជាមួយលោកស្រី ស៊ូជី ក្នុងអំឡុងពេលសន្ទនាតាមវីដេអូជាមួយប្រមុខរបបយោធា លោកMin Aung Hlaing។
អ្នកនាំពាក្យរបបយោធាលោក Zaw Min Tun បាននិយាយនៅក្នុងសារជាសំឡេងដែលចេញផ្សាយដោយក្រុមព័ត៌មានរបស់យោធាថា របបយោធាមិនមានហេតុផលដើម្បីសម្របសម្រួលឲ្យមានជំនួបនេះនៅពេលនេះទេ៕
វេទិកាបញ្ចេញមតិ