យោធាអ៊ីស្រាអែលបាននិយាយនៅថ្ងៃចន្ទនេះថា មនុស្សនៅផ្នែកភាគខាងកើតក្នុងទីក្រុង Rafah នៅតំបន់ហ្កាហ្សា (Gaza) គួរទៅតំបន់មនុស្សធម៌ដ៏ទូលំទូលាយមួយកន្លែងដែលនៅពេលនេះរួមបញ្ចូលទាំងទីក្រុង Khan Younis ផងដែរ។ នេះគឺជាវិធានការមួយដែលធ្វើឡើងមុនការវាយប្រហារដែលគ្រោងទុករបស់អ៊ីស្រាអែលលើទីក្រុង Rafah។
អ្នកនាំពាក្យយោធាអ៊ីស្រាអែលបានបញ្ជាក់នៅក្នុងសារបង្ហោះជាភាសាអារ៉ាប់នៅលើបណ្ដាញសង្គមអនឡាញថា យោធាអ៊ីស្រាអែលនឹងប្រើកម្លាំងចាត់វិធានការប្រឆាំងនឹងអង្គការភេរវកម្មនានានៅក្នុងទីក្រុង Rafah និងថា នរណាដែលស្ថិតនៅក្នុងទីក្រុងនោះនឹងប្រឈមនឹងហានិភ័យដល់អាយុជីវិត។
អ្នកនាំពាក្យយោធាអ៊ីស្រាអែលបានបន្ថែមថា អ៊ីស្រាអែលកំពុងត្រៀម «ប្រតិបត្តិការក្នុងទំហំមានកម្រិត» នៅក្នុងទីក្រុង Rafah ហើយខ្លួនបានអំពាវនាវឱ្យមនុស្សប្រហែល ១០០.០០០ នាក់ចាកចេញពីតំបន់ជម្លៀសនោះ។
អ៊ីស្រាអែលធ្លាប់ចេញការព្រមានដូចនេះរួចហើយនៅចំពេលដែលខ្លួនធ្វើយុទ្ធនាការដើម្បីកម្ចាត់ក្រុមសកម្មប្រយុទ្ធហាម៉ាស់ (Hamas) នៅក្នុងតំបន់ហ្កាហ្សា។ ជនជាតិប៉ាឡេស្ទីនជាច្រើននៅក្នុងតំបន់ហ្កាហ្សាបានធ្វើដំណើរទៅទីនោះដើម្បីស្វែងរកទីជ្រកកោន បន្ទាប់ពីអ៊ីស្រាអែលបានប្រាប់ពួកគេឱ្យភៀសខ្លួនចេញពីផ្នែកផ្សេងៗនៃតំបន់ហ្កាហ្សា។
អ៊ីស្រាអែលបានបញ្ជាក់ថា ប្រតិបត្តិការវាយប្រហារនៅក្នុងទីក្រុង Rafah គឺចាំបាច់ដើម្បីកម្ចាត់ក្រុមហាម៉ាស់ ចំណែកឯសហរដ្ឋអាមេរិក អង្គការសហប្រជាជាតិ និងប្រទេសផ្សេងទៀតបានព្រមានថាគ្រោះមហន្តរាយមនុស្សធម៌អាចកើតឡើងប្រសិនបើអ៊ីស្រាអែលអនុវត្តប្រតិបត្តិការវាយប្រហារ
ទ្រង់ទ្រាយធំនៅក្នុងតំបន់នោះ ដែលនៅទីនោះប្រជាជនតំបន់ហ្កាហ្សាជាងពាក់កណ្ដាលកំពុងជ្រកកោន។
រដ្ឋមន្ត្រីការពារជាតិអាមេរិកលោក Lloyd Austin បានលើកឡើងអំពីបញ្ហានេះម្ដងទៀតនៅក្នុងការសន្ទនាតាមទូរសព្ទកាលពីថ្ងៃអាទិត្យជាមួយនឹងរដ្ឋមន្ត្រីការពារជាតិអ៊ីស្រាអែលលោក Yoav Gallant៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP, AFP និង Reuters។
វេទិកាបញ្ចេញមតិ