ការវាយប្រហារដោយមីស៊ីលផ្លោងរបស់រុស្ស៊ីកាលពីថ្ងៃពុធលើទីក្រុងកំពង់ផែ Odesa នៃប្រទេសអ៊ុយក្រែនបានសម្លាប់មនុស្សបីនាក់ និងធ្វើឱ្យរបួសបីនាក់ទៀត។ នេះបើតាមការប្រាប់ឱ្យដឹងដោយអភិបាលតំបន់នោះ។
លោកអភិបាល Oleh Kiper បាននិយាយថា មានការខូចខាតហេដ្ឋារចនាសម្ព័ន្ធស៊ីវិលផងដែរដោយសារការវាយប្រហារនេះ ដែលជាការវាយប្រហារលើកទី ២ ដ៏ប្រល័យលើតំបន់ Odesa ក្នុងរយៈពេលច្រើនថ្ងៃកន្លងមកនោះ។
ដោយឡែកក្រសួងការពារជាតិរុស្ស៊ីបាននិយាយនៅថ្ងៃពុធនេះថា ខ្លួនបានបង្អាក់ការវាយប្រហារដោយដ្រូនអ៊ុយក្រែនដែលបានយកតំបន់មួយចំនួននៅរុស្ស៊ីជាទីដៅ។
ក្រសួងនេះបានថ្លែងថា ប្រព័ន្ធការពារដែនអាកាសខ្លួនបានបំផ្លាញដ្រូនបីគ្រឿងលើតំបន់Voronezh និងដ្រូននីមួយៗនៅលើតំបន់ Belgorod, Kursk និង Ryazan។
លោក Aleksandr Gusev អភិបាលតំបន់ Voronezh បានរាយការណ៍ថា បំណែកធ្លាក់ពីដ្រូនមួយគ្រឿងបានធ្វើឱ្យខូចខាតផ្ទះមួយខ្នង តែគ្មានមនុស្សរបួសទេ។ ប្រធានាធិបតីអ៊ុយក្រែនលោក Volodymyr Zelenskyy បានប្រើសុន្ទរកថាពេលយប់របស់លោកកាលពីថ្ងៃអង្គារដោយអំពាវនាវដល់ក្រុមសម្ព័ន្ធមិត្តឱ្យបញ្ជូនជំនួយយោធាឱ្យបានឆាប់រហ័សទៅឱ្យអ៊ុយក្រែន៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
វេទិកាបញ្ចេញមតិ