ភ្នំពេញ៖ អៀង សារី គ្មានបញ្ហាក្នុងការប្រមូលអារម្មណ៍ទេ ប៉ុន្តែគាត់មានស្ថានភាពចុះខ្សោយជាងមុន។ នេះគឺជាការសន្និដ្ឋានរបស់លោកវេជ្ជបណ្ឌិតជំនាញផ្នែកជំងឺមនុស្សចាស់ចន ខាំបល (John Campbel)។
លោកសាស្ដ្រាចារ្យខាំបល បានប្រាប់អង្គជំនុំជម្រះនៅថ្ងៃព្រហស្បតិ៍នេះក្នុងសវនាការស្តីពីសុខភាពនិងកាយសម្បទារបស់អៀង សារី របស់អង្គជំនុំជម្រះសាលាដំបូងនៃសាលាក្តីខ្មែរក្រហម។
«ខ្ញុំមិនបានរកឃើញភស្តុតាងណាមួយពីការចុះថយនៃការផ្ចង់អារម្មណ៍នោះទេ។ ហើយបើតាមអ្វីដែលខ្ញុំយល់នោះគឺសវនាការដំណើរការតែក្នុងរយៈពេលមួយម៉ោងកន្លះសម្រាកម្តង។ ដូច្នេះវាសមស្របនឹងសមត្ថភាពរបស់គាត់ហើយ»។
លោកវេជ្ជបណ្ឌិតជនជាតិនូវ៉ែលហ្សេឡង់បានពិនិត្យសុខភាពអៀង សារី ជាចុងក្រោយកាលពីថ្ងៃទី៤ និងទី៥ ខែវិច្ឆិកា។
លោកសាស្ដ្រាចារ្យខាំបលឆ្លើយសំណួររបស់ចៅក្រមនិល ណុន ប្រធានអង្គជំនុំជម្រះ សំណួររបស់លោកស្រីចៅក្រម ស៊ីលវៀរ ខាតរ៉ាយ និងមេធាវីរបស់អៀង សារី លោកម៉ាយឃើល ខាណាវ៉ាស ថា ជនជាប់ចោទដែលមានអាយុ៨៧ឆ្នាំរូបនេះមានការចុះខ្សោយផ្នែករាងកាយ ប៉ុន្តែមិនមែនជាការរារាំងដល់ការចូលរួមសវនាការទេ។
«គាត់ខ្សោយជាងពីពេលមុន ហើយបញ្ហានេះដោយសារតែគាត់អសកម្មផ្នែករាងកាយក្នុងរយៈពេលពីរខែចុងក្រោយឬក្នុងរយៈពេលប្រហាក់ប្រហែលគ្នានេះ»។
លោកសាស្ដ្រាចារ្យវេជ្ជបណ្ឌិតដដែលបញ្ជាក់ថា លោកបានជួបជាមួយអៀង សារី ក្នុងរយៈពេលមួយម៉ោង ឬមួយម៉ោងជាង អៀង សារី អាចឆ្លើយនឹងនិយាយតបទៅនឹងសំណួរដោយគ្មានបញ្ហានោះទេ។
លោកក៏បានផ្តល់យោបល់ថាអៀង សារី មិនចាំបាច់បន្តស្នាក់នៅមន្ទីរពេទ្យតទៅទៀតនោះទេ។
អៀង សារី បានចូលសម្រាកពេទ្យចាប់តាំងពីដើមខែកញ្ញាមកម្លេះ ហើយទើបតែមានវត្តមាននៅក្នុងឱកាសសវនាការនៅថ្ងៃនេះ។ ប៉ុន្តែលោកបានស្ថិតនៅបន្ទប់ឃុំឃាំងផ្នែកខាងក្រោមសាលសវនាការដើម្បីតាមដានការជម្រះក្តីអំពីបញ្ហាសុខភាពរបស់គាត់តាមទូរទស្សន៍។
សំណុំរឿង០០២មានជនជាប់ចោទបួននាក់គឺអៀង សារី អតីតរដ្ឋមន្ដ្រីការបរទេសខ្មែរក្រហម ប្រពន្ធរបស់គាត់អៀង ធីរិទ្ធ អតីតរដ្ឋមន្ដ្រីសង្គមកិច្ច នួន ជា ប្រធានសភានិងខៀវ សំផន អតីតប្រមុខរដ្ឋ។
អៀង ធីរិទ្ធ ត្រូវតុលាការដោះលែងជាមួយលក្ខខណ្ឌបណ្តោះអាសន្នបន្តិចបន្តួចដោយសំអាងថាគាត់មានជំងឺវង្វេងស្មារតីធ្ងន់ធ្ងរ។
លោកខាណាវ៉ាស បានដេញសួរដល់លោកចន ខាំបលពីបញ្ហាផ្ចង់អារម្មណ៍ដែលអាចបណ្តាលមកពីវ័យចំណាស់ និងសុខភាពរបស់អៀង សារី ប៉ុន្តែលោកចន ខាំបល នៅតែរក្សាចម្លើយដដែលថាអៀង សារី នៅមានសមត្ថភាពចូលរួមសវនាការហើយលោកផ្តល់យោបល់ថា អៀង សារី អាចចូលរួមសវនាការពីបន្ទប់ឃុំឃាំងខាងក្រោមសាលសវនាការដែលអាចអនុញ្ញាតឲ្យជនជាប់ចោទមានភាពងាយស្រួលជាង។ អង្គជំនុំជម្រះសាលាដំបូងមិនទាន់សម្រេចសេចក្ដីលើបញ្ហាសុខភាពរបស់អៀង សារីនេះនៅឡើយ៕
