ភ្នំពេញ៖ ជនជាប់ចោទនៅក្នុងសំណុំរឿង០០២ម្នាក់ទៀតគឺ ខៀវ សំផន ត្រូវបានបញ្ជូនទៅកាន់មន្ទីរពេទ្យ ហើយនៅថ្ងៃពុធនេះដោយសារអាការៈហេវហត់និងអស់កម្លាំងខ្លាំង។ ប៉ុន្តែគេនៅមិនទាន់ដឹងពីសញ្ញាណរោគពិតប្រាកដរបស់ជនជាប់ចោទនៅឡើយទេ។
លោកនេត្រ ភក្ត្រា អ្នកនាំពាក្យសាលាក្តីខ្មែរក្រហមបានឲ្យដឹងថាអតីតប្រមុខរដ្ឋនៃរបបកម្ពុជាប្រជាធិបតេយ្យខ្មែរក្រហមត្រូវដឹកទៅកាន់មន្ទីរពេទ្យមិត្តភាពខ្មែរសូវៀតកាលពីព្រឹកវេលាម៉ោង៩និង៤៥នាទី។
«រហូតមកទល់ពេលនេះខ្ញុំនៅមិនទាន់មានរបាយការណ៍ណាមួយពីស្ថានភាពសុខភាពរបស់លោកខៀវ សំផនទេ។ ហើយក្រុមគ្រូពេទ្យកំពុងតែត្រួតពិនិត្យ។ ដូច្នេះយើងមិនទាន់ដឹងថាតើលោកខៀវ សំផនមានជំងឺអ្វីពិតប្រាកដនៅឡើយទេ»។
នេះគឺជាជនជាប់ចោទទី២ក្នុងសំណុំរឿង០០២ដែលត្រូវបញ្ជូនទៅកាន់មន្ទីរពេទ្យបន្ទាប់ពីនួន ជាអតីតប្រធានសភាខ្មែរក្រហមបានចូលពេទ្យកាលពីល្ងាចថ្ងៃអាទិត្យកន្លងទៅនេះដោយសារជំងឺរលាកទងសួតនិងអស់កម្លាំងខ្លាំង។
លោកគង់ សំអុន សហមេធាវីកម្ពុជារបស់ខៀវ សំផន កំពុងរង់ចាំរបាយការណ៍របស់ក្រុមគ្រូពេទ្យនៅឡើយ។
«យើងមិនទាន់មានសេចក្តីរាយការណ៍ចុងក្រោយទេតែស្ថានភាពរបស់គាត់គឺអស់កម្លាំង ខ្សោយនិងដកដង្ហើមញាប់»។
ខៀវ សំផន ជាជនជាប់ចោទដែលមានវ័យក្មេងជាងគេ អាយុ៨១ឆ្នាំ ក្នុងសំណុំរឿងទី២ខណៈដែលនួន ជា អាយុ៨៦ឆ្នាំនិងអៀង សារី អាយុ៨៧ឆ្នាំ។
ជនជាប់ចោទទាំងបីសុទ្ធតែកំពុងស្ថិតក្នុងភាពចាស់ជរានិងមានជំងឺប្រចាំខ្លួន។
លោកឡុង បញ្ញាវុធ មន្ត្រីគម្រោងនៃអង្គការគំនិតផ្តួចផ្តើមយុត្តិធម៌សង្គមសេរីនៅកម្ពុជាដែលជាផ្នែកមួយរបស់អង្គការOSJI របស់សហរដ្ឋអាមេរិកមានប្រសាសន៍ថាស្ថានភាពសុខភាពរបស់ជនជាប់ចោទបានក្លាយជាកង្វល់ដល់ការជម្រះទោស។
លោកលើកឡើងថាសាលាក្តីខ្មែរក្រហមគ្រោងនឹងបញ្ចប់ការកាត់ក្តីវគ្គទី១ក្នុងសំណុំរឿង០០២នៅខែមិនាខាងមុខក៏ប៉ុន្តែជំងឺបៀតបៀនរបស់ជនជាប់ចោទអាចនឹងនាំឲ្យសាលាក្តីខ្មែរក្រហមទៅមិនដល់គោលដៅនេះ។
«បញ្ហាសុខភាពរបស់ជនជាប់ចោទអាចទី១ប៉ះពាល់ដល់ដំណើរការជំនុំជម្រះ ហើយក៏អាចប៉ះពាល់ដល់សិទ្ធិនៅក្នុងការចូលរួមជំនុំជម្រះនៅចំពោះមុខដែរ»។
ដោយសារជំងឺរបស់ជនជាប់ចោទអង្គជំនុំជម្រះសាលាដំបូងបានផ្អាកសវនាការនៅក្នុងសប្តាហ៍នេះប៉ុន្តែមិនទាន់កំណត់ជាក់លាក់ថាតើអាចបន្តសវនាការឬយ៉ាងណានៅសប្តាហ៍ក្រោយនេះទេ។
លោកឡុង បញ្ញាវុធ ផ្តល់យោបល់ថាសាលាក្តីខ្មែរក្រហមគួរពិចារណាបំបែកសំណុំរឿងរបស់ជនជាប់ចោទនិមួយៗដើម្បីកុំឲ្យដំណើរការក្តីជាប់គាំង៕
