ប្រទេសចំនួនប្រាំក្នុងតំបន់អាស៊ី នៅថ្ងៃពុធនេះបានជួបប្រជុំគ្នាក្នុងប្រទេសកម្ពុជាដើម្បីជជែកវែកញែកស្តីពីការចូលរួមរបស់ស្ត្រីក្នុងវិស័យនយោបាយ។
ប្រទេសទាំងប្រាំដែលកំពុងជួបប្រជុំគ្នារួមមានប្រទេសកម្ពុជា វៀតណាម ហ្វីលីពីន បង់ក្លាដេស និង ទីម័រខាងកើត។ ការជួបជុំគ្នានេះត្រូវបានរៀបចំឡើងដោយអង្គការសន្តិភាពនិងអភិវឌ្ឍន៍ហៅកាត់ថាPyD របស់ប្រទេសអេស្ប៉ាញ។
នេះជាកិច្ចប្រជុំលើកទី២ ដែលលើកទី១ត្រូវបានធ្វើឡើងនៅខែតុលា ឆ្នាំ២០១១ ក្នុងប្រទេសហ្វីលីពីនដើម្បីលើកកំពស់សមភាពភេទក្នុងវិស័យនយោបាយ ពិសេសសិទ្ធិនយោបាយរបស់ស្ត្រីតាមរយៈការធ្វើឲ្យប្រសើរឡើងនូវបរិមាណស្ត្រីចូលរួមក្នុងនយោបាយទាំងផ្លូវការ និងមិនផ្លូវការ។
រដ្ឋមន្ត្រីក្រសួងកិច្ចការនារីកម្ពុជាលោកស្រី អ៊ឹង កន្ថាផាវី បានមានប្រសាសន៍ថា នេះជាការជួបពិគ្រោះយោបល់លើបទពិសោធន៍របស់ប្រទេសនីមួយៗ ដើម្បីឆ្លុះបញ្ចាំងឧបសគ្គ និងភាពរីកចម្រើន ដែលចាំបាច់ត្រូវរួមគ្នាដោះស្រាយបន្តទៀត។
«មានឧសគ្គចំបងមួយចំនួនដែលជាការរារាំងដល់ការសម្រេចចិត្តរបស់ស្ត្រីក្នុងការចូលរួមនយោបាយ ដូចជាកង្វះការគាំទ្រពីក្រុមគ្រួសារ និងសង្គម ជាពិសេសធនធានហិរញ្ញវត្ថុរបស់ស្រ្តីនៅមានកម្រិតទាបជាងបុរស។ ស្ត្រីខ្លួនឯងនៅមានកង្វល់ថា ខ្លួនមិនទាន់មានសមត្ថភាពគ្រប់គ្រាន់ដើម្បីដឹកនាំ និងចូលប្រឡូកក្នុងឆាកនយោបាយ។ ដូច្នេះយើងនៅតែបន្តបើកកម្មវិធីក្នុងការពង្រឹងសមត្ថភាពរបស់ស្ត្រី នៅក្នុងភាពជាអ្នកដឹកនាំក្នុងជំនាញមួយចំនួនដែលគាត់មិនទាន់មានចំណេះដឹងគ្រប់គ្រាន់ ដូចជាក្នុងការគ្រប់គ្រងការងារជំនាញពាក់ព័ន្ធនឹងការអភិវឌ្ឍផែនការតាមសហគមន៍នៅក្នុងសង្គមដែលនៅមានការខ្វះខាត និងជំនាញភាពជាមគ្គុទេសក៍»។
លោក ស្តេហ្វាណូ ប្រ៊ីហ្គូនី (Stefano Brigoni) តំណាងអង្គការសន្តិភាព និងអភិវឌ្ឍន៍ប្រចាំអាស៊ីមានប្រសាសន៍ថា វាមានសារៈសំខាន់ណាស់ក្នុងការផ្តល់ឲ្យស្ត្រីនូវភាពស្មើគ្នាក្នុងការចូលរួមក្នុងឆាកនយោបាយដើម្បីភាពរីកចម្រើនថែមទៀតនៅក្នុងប្រទេសនីមួយៗ។
លោកបានទទួលស្គាល់ថា មានការកើនឡើងហើយនូវបរិមាណស្ត្រីក្នុងឆាកនយោបាយនៅប្រទេសក្នុងតំបន់អាស៊ីមួយចំនួន។
លោកស្រីរដ្ឋមន្ត្រីក្រសួងកិច្ចការនារី អ៊ឹង កន្ថាផាវី បានឲ្យដឹងថា កម្ពុជាមកដល់ពេលនេះមានស្ត្រីប្រមាណ២១ភាគរយហើយនៅក្នុងអសនៈរដ្ឋសភា ហើយរដ្ឋាភិបាលកម្ពុជាក្នុងឆ្នាំ២០១៥ប្តេជ្ញាថានឹងបង្កើនឲ្យដល់៣០ភាគរយ នេះ៕
