ភ្នំពេញ៖ ក្រោយពីព្រះរាជពិធីបុណ្យព្រះបរមសពសម្តេចឪនរោត្តមសីហនុបានបញ្ចប់ ព្រះមហាក្សត្រនរោត្តមសីហមុនីនិងសម្តេចម៉ែនរោត្តមមុនីនាថសីហនុគ្រោងនឹងស្តេចយាងចាកចេញពីប្រទេសកម្ពុជាឆ្ពោះទៅកាន់ទីក្រុងប៉េកាំង ប្រទេសចិនប្រជាមានិត នៅចុងខែកុម្ភៈខាងមុខនេះ។ នេះបើតាមការបញ្ជាក់ពីមន្ត្រីព្រះបរមរាជវាំង និងមន្ត្រីជាន់ខ្ពស់គណបក្សហ៊្វុនស៊ីនប៉ិច។
លោកញ៉ឹក ប៊ុនឆៃ ប្រធានប្រតិបត្តិគណបក្សហ៊្វុនស៊ីនប៉ិច បាននិយាយនៅថ្ងៃច័ន្ទនេះថា តាមការអញ្ជើញរបស់រដ្ឋាភិបាលចិន ព្រះមហាក្សត្រ សម្តេចម៉ែ ព្រមទាំងលោកកែវ ពុទ្ធរស្មី និងភរិយារបស់លោកគឺព្រះអង្គម្ចាស់អារុណ រស្មី ប្រធានគណបក្សហ៊្វុនស៊ីនប៉ិច និងសមាជិករាជវង្សផ្សេងទៀតគ្រោងនឹងយាងចាកចេញពីកម្ពុជានៅថ្ងៃទី២៤ខាងមុខនេះ។
«ទេនេះប្រទេសចិនចង់យាងជាផ្លូវការបង្ហាញពីការគាំទ្រ អត់ពីព្រះមហាក្សត្រទៅ»។
គម្រោងយាងចាកចេញពីប្រទេសកម្ពុជារបស់ព្រះមហាក្សត្រ សម្តេចម៉ែ និងសមាជិករាជវង្សានុវង្សមួយចំនួនបានកើតមានឡើងតែជាងពីរសប្តាហ៍ប៉ុណ្ណោះ បន្ទាប់ពីព្រះរាជពិធីបុណ្យព្រះបរមសពសម្តេចឪនរោត្តមសីហនុបានបញ្ចប់កាលពីសប្តាហ៍មុន។
ព្រះអង្គម្ចាស់ស៊ីសុវត្ថិ ធម្មិកោ អតីតព្រះលេខាផ្ទាល់សម្តេចឪនរោត្តមសីហនុដែលគ្រោងនឹងយាងចាកចេញជាមួយព្រះមហាក្សត្រដែរនោះ បានមានបន្ទូលថា ព្រះមហាក្សត្រនិងសម្តេចម៉ែគ្រោងនឹងគង់នៅទីក្រុងប៉េកាំងចំនួនជាងពីរសប្តាហ៍តែប៉ុណ្ណោះ។
ព្រះអង្គមា្ចស់ធម្មិកោមានបន្ទូលថា ការយាងចាកចេញរបស់ព្រះមហាក្សត្រគឺទៅព្យាបាលព្រះរោគតែប៉ុណ្ណោះ។
«គឺព្រះករុណាព្រះមហាក្សត្រក្តី សម្តេចម៉ែក្តី ព្រះអង្គត្រូវតែពិនិត្យព្រះរាជសុខភាពពីរឆ្នាំម្តង ហើយនិងចុងខែ២ ដើមខែ៣គឺដល់ពេលដែលលោកត្រូវយាងទៅពិនិត្យ។ ហើយលោកពិនិត្យលើកចុងក្រោយខែ៩ឆ្នាំមុន»។
ក្រុមអ្នកវិភាគនិងមន្ត្រីរដ្ឋាភិបាលខ្លះបានបង្ហាញទស្សនៈខុសៗគ្នានៅជុំវិញការយាងចាករបស់ព្រះមហាក្សត្រ និងសម្តេចម៉ែចេញពីប្រទេសកម្ពុជាភ្លាមៗ ក្រោយពីព្រះរាជពិធីបុណ្យសម្តេចឪ។
លោកបណ្ឌិតឡៅ ម៉ុងហៃ អ្នកវិភាគឯករាជ្យ បាននិយាយថា ដោយសារតែព្រះអង្គមានភាពធុញព្រះហឫទ័យនិងនឿយហត់ខ្លាំង ក្រោយពីព្រះរាជពិធីបុណ្យព្រះបិតារបស់ព្រះអង្គ ទើបព្រះអង្គស្តេចយាងចាកចេញទៅសម្រាកព្រះកាយនៅប្រទេសចិន។
«មានន័យថា ស្របគ្នាមួយរយៈពេលដើម្បីឲ្យស្រឡះបន្តិចទៅ ក្រោយពេលមរណៈទុក្ខ ហើយរៀបចំមមារញឹក»។
លោកផៃ ស៊ីផាន អ្នកនាំពាក្យនៃទីស្តីការគណៈរដ្ឋមន្ត្រី មានប្រសាសន៍ថា ការយាងរបស់ព្រះមហាក្សត្រទៅកាន់ប្រទេសចិនជាសញ្ញាមួយបន្ថែមទៀតនៃការពង្រឹងទំនាក់ទំនងបន្ថែមទៀតរវាងកម្ពុជា និងប្រទេសចិន បន្ទាប់ពីសម្តេចឪបានសោយព្រះទិវង្គត។
«មិនមែនមានសេចក្តីថា អស់ព្រះបរមរតនកោដ្ឋរបស់យើងគឺដាច់ខ្សែរយៈនោះទេ។ នេះជាសញ្ញាបង្ហាញបន្ថែមទៀតនូវទំនាក់ទនងល្អនៃកិច្ចសហប្រតិបត្តិការរឹងមាំ ដែលជាការបង្ហាញរបស់រដ្ឋាភិបាលចិនក៏ដូចជាប្រជាពលរដ្ឋរបស់ចិន»។
សម្តេចឪនរោត្តមសីហនុ ព្រះអង្គមានទំនាក់ទំនងយ៉ាងជិតស្និទ្ធជាមួយរដ្ឋាភិបាលចិនតាំងពីយូរយារណាស់មកហើយរហូតដល់ព្រះអង្គសោយទិវង្គតកាលពីថ្ងៃទី១៥ខែតុលាឆ្នាំមុននេះ។
ព្រះរាជពិធីបុណ្យព្រះបរមរតនកោដ្ឋទើបតែបានបញ្ចប់កាលពីសប្តាហ៍មុនដោយមានការចូលរួមពីប្រជានុរាស្ត្ររាប់លាននាក់ មន្ត្រីជាន់ខ្ពស់រដ្ឋាភិបាល ស្ថាប័នរដ្ឋសភា ស្ថាប័នព្រឹទ្ធសភា និងមានការចូលរួមពីថ្នាក់ដឹកនាំមកពីបណ្តាប្រទេសមួយចំនួន៕
