ភ្នំពេញ៖ គណៈកម្មការជំនាញរបស់រដ្ឋសភានៅថ្ងៃពុធនេះបានបដិសេធសេចក្តីស្នើសុំរបស់អ្នកតំណាងរាស្ត្រ មកពីគណបក្សប្រឆាំងអំពីការដំឡើងប្រាក់បៀវត្សរ៍ដល់ក្រុមកម្មករកាត់ដេរសម្លៀកបំពាក់និងមន្ត្រីរាជការស៊ីវិល។
ការបដិសេធនេះបានធ្វើឡើងបន្ទាប់ពីមានកិច្ចប្រជុំគ្នាមួយរវាងអ្នកតំណាងរាស្ត្រមកពីគណបក្សមិនកាន់អំណាចនិងគណៈកម្មការជំនាញទាំង៩របស់រដ្ឋសភា ក្រសួងការងារ ក្រសួងមុខងារសារធារណៈ និងក្រសួងកិច្ចការនារី។
លោកស្មាន ទៀត អ្នកតំណាងរាស្ត្រគណបក្សគ្រប់គ្រងអំណាចនិងជាអនុប្រធានគណៈកម្មាធិការហិរញ្ញវត្ថុរបស់រដ្ឋសភាបានប្រាប់អ្នកកាសែតបន្ទាប់ពីកិច្ចប្រជុំថារដ្ឋសភាបានទាត់ចោលសេចក្តីស្នើរបស់គណបក្សប្រឆាំងដោយបានចាត់ទុកថាការស្នើឡើងនេះគឺដើម្បីកេងចំណេញផ្នែកនយោបាយមុនពេលបោះឆ្នោតតែប៉ុណ្ណោះ។
«ជាលទ្ធផលនៃស្មារតីនៃអង្គប្រជុំគណៈកម្មការទាំងពីរហ្នឹងបានឯកភាពគ្នាគឺសុំមិនទទួលយកនូវសេចក្តីស្នើច្បាប់នេះដោយផ្អែកលើសេចក្តីស្នើច្បាប់នេះមិនសមស្របទៅនឹងស្ថានភាពជាក់ស្តែងនៃព្រះរាជាណាចក្រកម្ពុជាដោយប្រកាន់យកនូវរបបសេដ្ឋកិច្ចទីផ្សារសេរី»។
គណបក្សប្រឆាំងរបស់ប្រទេសកម្ពុជាកាលពីចុងខែកុម្ភៈបានដាក់សេចក្តីស្នើឱ្យដំឡើងប្រាក់បៀវត្សរ៍ដល់ក្រុមកម្មករកាត់ដេរសម្លៀកបំពាក់រហូតដល់៦០ម៉ឺនរៀលគឺប្រមាណ១៥០ដុល្លារ ចំណែកឯមន្ត្រីរាជការស៊ីវិលស្នើសុំឱ្យដំឡើងដល់១លានរៀលគឺប្រមាណ២៥០ដុល្លារក្នុងមួយខែៗ។
សេចក្តីស្នើសុំនេះគណបក្សប្រឆាំងចង់ឱ្យដាក់ក្នុងរបៀបវារៈនៃកិច្ចប្រជុំរដ្ឋសភាដែលគ្រោងធ្វើនៅ
ពេលខាងមុខនេះ។
លោកស្មាន ទៀត បាននិយាយថានៅប្រទេសកម្ពុជាយើងអនុវត្តទៅតាមការជាក់ស្តែងប្រសិនណាបើសេដ្ឋកិច្ចយើងឡើងគឺយើងដំឡើងទៅតាមនោះ។លោកបញ្ជាក់ថាកម្មករកាត់ដេរសម្លៀកបំពាក់ក្រសួងការងារបានសម្រេចជាមួយសហជីពរួចហើយគឺដំឡើងចាប់ពី៦១ដុល្លាររហូតដល់៨០ដុល្លារក្នុងមួយខែៗនិងមានគុណបំណាច់ផ្សេងៗទៀត។ ចំណែកឯមន្ត្រីរាជការដំឡើងប្រាក់បៀវត្សរ៍គឺផ្អែកទៅតាមកំណើនសេដ្ឋកិច្ច។
លោកសុន ឆៃ ប្រធានក្រុមអ្នកតំណាងរាស្ត្ររបស់គណបក្សប្រឆាំងដែលបានដឹកនាំកិច្ចប្រជុំនេះបានហៅការច្រានចោលរបស់គណៈកម្មការជំនាញរបស់រដ្ឋសភាថាជាការរើសអើងផ្នែកនយោបាយ។
លោកបាននិយាយថាការដំឡើងប្រាក់បៀវត្សរ៍ដល់ក្រុមកម្មករឱ្យបានសមរម្យអាចនឹងទប់ស្កាត់ការធ្វើកូដកម្មនិងបាតុកម្ម។
«បើបន្តប្រាក់កម្រៃតិចដល់កម្មករនេះរោងចក្រដែលត្រូវបិទទ្វារឬក៏មិនមកធ្វើវិនិយោគទុនគឺមិនមែនដោយសារតែប្រាក់កម្រៃរបស់កម្មករទេគឺដោយសារតែមិនមានកម្មករមកធ្វើការក្នុងរោងចក្រនៅប្រទេសយើងដែលឱ្យកម្រៃទាបគេសុខចិត្តទៅប្រទេសដទៃ»។
លោកសុន ឆៃបានបញ្ជាក់ទៀតថានៅក្នុងប្រទេសកម្ពុជាមានលទ្ធភាពច្រើនណាស់ក្នុងការដំឡើងប្រាក់បៀវត្សរ៍ដល់កម្មករនិងមន្ត្រីរាជការគឺយើងយកពីការបង់ប្រាក់ពន្ធគយមិនត្រឹមត្រូវក្នុងមួយឆ្នាំៗប្រមាណពី១.៣០០លានដុល្លារទៅ១.៥០០លានដុល្លារ។
លោកបាននិយាយថាមានមន្ត្រីរាជការបច្ចុប្បន្ននេះមានតែម្នាក់តែមានឈ្មោះនៅតាមក្រសួងខ្លះពី៦ទៅ៧កន្លែងដែលពុំទាន់មានវិធានការរបស់រដ្ឋាភិបាលក្នុងការលុបឈ្មោះមន្ត្រីបំប៉ោងទាំងនោះទេ។ លោកបានបញ្ជាក់ថាទង្វើនេះនាំឱ្យមានការកេងបន្លំថវិកាជាតិធ្ងន់ធ្ងរណាស់។
លោកនាយករដ្ឋមន្ត្រីហ៊ុន សែនកាលពីថ្ងៃអង្គារបាននិយាយថាចាប់ពីឆ្នាំក្រោយៗទៅលោកនឹងផ្លាស់ប្តូរពីការដំឡើងប្រាក់បៀវត្សរ៍ដល់មន្ត្រីរាជការប្រមាណ២០%ក្នុងមួយឆ្នាំទៅជាការដំឡើងប្រាក់បៀវត្សរ៍ទៅតាមកំណើនសេដ្ឋកិច្ចវិញទាំងមន្ត្រីរាជការនិងកម្មករ៕
