អន្តេវាសិកដ្ឋានជួយដល់និស្សិតស្រីខ្មែរដែលមកពីជនបទ
នៅប្រទេសកម្ពុជា ចំនួននិស្សិតស្រីនៅតែមានចំនួនតិចជាងនិស្សិតប្រុស។ ប៉ុន្តែនៅក្នុងទីក្រុងភ្នំពេញ អង្គការមួយសង្ឃឹមថានឹងអាចផ្លាស់ប្តូរស្ថានភាពនេះ។ មូលនិធិ Harpswell បានបើកអន្តេវាសិកដ្ឋានសម្រាប់និស្សិតស្រីចំនួនពីរកន្លែងក្នុងរាជធានី ក្នុងកិច្ចប្រឹងប្រែងជំរុញឲ្យយុវនារីបានបន្តការសិក្សានៅឧត្តមសិក្សា។ អន្តេវាសិកដ្ឋានទាំងនេះត្រូវបានកសាងនៅឆ្នាំ២០០៦ ហើយបានផ្តល់ដល់យុវនារីខ្មែរនូវកន្លែងស្នាក់នៅមានសុវត្ថិភាព ក៏ដូចជាផ្តល់ការបណ្តុះបណ្តាលភាពជាអ្នកដឹកនាំ និងឱកាសការងារផ្សេងៗទៀត។ លោក សឹង សុផាតនៃវីអូអេបានពិភាក្សាជាមួយអតីតនិស្សិតនៃកម្មវិធី Harpswell ចំនួន៦រូបដែលបានមកទស្សនកិច្ចនៅរដ្ឋធានីវ៉ាស៊ីនតោនអំពីបទពិសោធន៍និងបញ្ហាដែលពួកគេបានជួបប្រទះនៅឧត្តមសិក្សា៕
