វ៉ាស៊ីនតោន —
រដ្ឋាភិបាលផ្តាច់ការនៅជុំវិញពិភពលោកកំពុងបង្កើនការវាយប្រហារលើសកម្មជនការពារសិទ្ធិមនុស្សនិងក្រុមអង្គការសង្គមស៊ីវិល ហើយការគាបសង្កត់នេះមានកាន់តែច្រើនឡើងនៅក្នុងពេលថ្មីៗនេះ។
លោកដេវីដ ក្រាមមឺ ប្រធានអង្គការFreedom House បានថ្លែងនៅក្នុងកម្មវិធីពិភាក្សាមួយនៅរដ្ឋធានីវ៉ាស៊ីនតោនថា៖ «ចាប់ផ្តើមតាំងពីមួយទសវត្សរ៍មកហើយ របបផ្តាច់ការបានចាត់វិធានការដើម្បីរឹតត្បិត ធ្វើឱ្យចុះខ្សោយ ឬក៏បិទអង្គការសង្គមស៊ីវិលដែលពួកគេយល់ថាជាការគំរាមកំហែងដល់អំណាចផ្តាច់មុខរបស់ពួកគេ»។
ក្នុងកម្មវិធីពិភាក្សាដែលបង្ហាញពីការវាយប្រហារមកលើក្រុមសង្គមស៊ីវិលនិងការឆ្លើយតបរបស់សហរដ្ឋអាមេរិកដែលបានរៀបចំកាលពីដើមខែកញ្ញាបានបង្ហាញថាអ្នកធ្វើការឱ្យអង្គការសង្គមស៊ីវិលឬបណ្តាញព័ត៌មានត្រូវបានគេយកមកកាត់ទោសនៅ តុលាការ ឬក៏រងការប្តឹងផ្តល់ឱ្យសងសំណងជាប្រាក់រាប់លានដុល្លារជាដើម។
នៅប្រទេសរុស្ស៊ីវិញ លោក Pavel Chikov ប្រធាននៃអង្គការសិទ្ធិមនុស្សAGORA បានបញ្ជាក់ថាមានច្បាប់មួយចំនួនដែលរដ្ឋាភិបាលប្រើប្រាស់ដើម្បីបង្កើតនូវបរិយាកាសភ័យខ្លាចចំពោះសកម្មជនសិទ្ធិមនុស្សបើទោះបីជាការអនុវត្តដាក់ទោសទណ្ឌពិតប្រាកដនៅមិនទាន់មានច្រើនក៏ដោយ។ ក្នុងចំណោមនោះគឺមានច្បាប់ដែលប្រឆាំងនឹងសកម្មភាពអង្គការសង្គមស៊ីវិល ច្បាប់គ្រប់គ្រងបណ្តាញអ៊ីនធឺណិត និងការតម្រូវឱ្យអង្គការចុះឈ្មោះជាទីភ្នាក់ងារបរទេសជាដើមចំពោះអង្គការណាដែលទទួលជំនួយពីបរទេស។
«រដ្ឋាភិបាលរុស្ស៊ីព្យាយាមដាក់សម្ពាធនេះដើម្បីព្យាយាមគ្រប់គ្រងអ្នកធ្វើការសំខាន់ៗក្នុងវិស័យសិទ្ធិមនុស្សប៉ុន្តែសម្រាប់ពួកយើងយល់ថានេះពិតជាការគំរាមកំហែងមួយ»។
សម្រាប់ប្រទេសភូមាចាប់តាំងពីឆ្នាំ២០១១មកមានការបន្ធូរបន្ថយការរឹតបន្តឹងលើសកម្មភាពរបស់ពលរដ្ឋហើយឃើញមានការលេចឡើងនូវអង្គការសង្គមស៊ីវិលជាច្រើនប៉ុន្តែពួកគេនៅតែបន្តប្រឈមនឹងការគំរាមកំហែង ការបំភិតបំភ័យនិងបង្កឧបសគ្គផ្លូវច្បាប់ដដែលហើយក្រុមយោធាខ្លះបានព្យាយាមបញ្ចូលឥទ្ធិពលរបស់ពួកគេទៅក្នុងសកម្មភាពរបស់អង្គការសង្គមស៊ីវិល។
លោក Aung Maw Zin មន្ត្រីគម្រោងនៃមូលនិធិទ័យទានជាតិសម្រាប់លទ្ធិប្រជាធិបតេយ្យនៅតំបន់អាស៊ីបានបញ្ជាក់ថា៖ «ពួកយោធាខ្លះបានបង្កើតនូវមូលនិធិសប្បុរសធម៌ថ្មីៗ កាន់កាប់សារព័ត៌មានឬក៏បរិច្ចាគទឹកប្រាក់ជាច្រើនទៅឱ្យមូលនិធិមនុស្សធម៌របស់គណបក្សប្រឆាំងឬអង្គការដែលមានកេរ្តិ៍ឈ្មោះល្បីៗមួយចំនួនក្នុងគោលដៅដើម្បីបញ្ចូលឥទ្ធិពលរបស់ពួកគេលើការងាររបស់អង្គការទាំងនោះ»។
ការជួយទាំងនេះក៏ដើម្បីជាការលាងសម្អាតកេរ្តិ៍ឈ្មោះរបស់ពួកគេដើម្បីឱ្យសហរដ្ឋអាមេរិកនិងបណ្តាប្រទេសអឺរ៉ុបមួយចំនួនដកឈ្មោះចេញពីបញ្ជីខ្មៅ។
ដោយឡែកនៅប្រទេសកម្ពុជាវិញក្រុមអង្គការសង្គមស៊ីវិលបានរាយការណ៍ឱ្យដឹងពី សកម្មភាពស្រដៀងគ្នានេះដែរដោយពួកគេបន្តរងការរិះគន់ដែលធ្វើឡើងដោយអ្នកកាន់អំណាច។
លោកអ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបានបញ្ជាក់ថានៅពេលឥឡូវនេះនៅពេលដែលរដ្ឋាភិបាលថ្មីបានបង្កើតរួចទៅហើយគឺរដ្ឋាភិបាលកម្ពុជាបានឈានទៅក្រោយទម្លាប់ចាស់ដដែលក្នុងការវាយប្រហារមកលើតួរនាទីរបស់អង្គការក្រៅរដ្ឋាភិបាល។
«ក្នុងនោះមានការចោទប្រកាន់ពីភាពលម្អៀងរបស់អង្គការក្រៅរដ្ឋាភិបាលដោយសារខ្លួនរិះគន់រដ្ឋាភិបាលពីបញ្ហាសិទ្ធិមនុស្សនិងបញ្ហាបោះឆ្នោត។ អញ្ចឹងមានការចោទប្រកាន់លើរដ្ឋាភិបាលប៉ុន្តែយើងមានការព្រួយបារម្ភដែរព្រោះពីដើមមកយើងព្រួយបារម្ភពីការអនុម័តច្បាប់មួយដើម្បីរឹតបន្តឹងអង្គការក្រៅរដ្ឋាភិបាលជាពិសេសបើសិនជាច្បាប់ហ្នឹងរឹតបន្តឹងទៅលើការចូលរួមការតវ៉ានយោបាយបញ្ហាលទ្ធិប្រជាធិបតេយ្យហើយនឹង បញ្ហាសិទ្ធិមនុស្សហើយមួយទៀតគឺអាចទាក់ទងនឹងការព្រួយបារម្ភនៃការរឹតបន្តឹងនោះគឺរឿងហិរញ្ញវត្ថុដែលគាំទ្រដល់អង្គការក្រៅរដ្ឋាភិបាលផងដែរ»។
សហរដ្ឋអាមេរិកបានទទួលស្គាល់ពីការលំបាកដែលក្រុមអង្គការក្រៅរដ្ឋាភិបាលទទួលរងក្នុងការបំពេញការងាររបស់ខ្លួនហើយបានបញ្ជាក់ពីជំហរក្នុងការផ្តល់ការការពារដល់សកម្មជនសិទ្ធិមនុស្សទាំងនោះ។
លោកស្រីសារ៉ា ម៉េលដេលសុន ឧបការីរងរដ្ឋបាលនៃការិយាល័យទទួលបន្ទុកលទ្ធិប្រជាធិបតេយ្យ ជម្លោះ និងជំនួយមនុស្សធម៌របស់ទីភ្នាក់ងារជំនួយអភិវឌ្ឍន៍អន្តរជាតិរបស់សហរដ្ឋអាមេរិកដែលជាវាគ្មិនក្នុងកិច្ចពិភាក្សានោះបញ្ជាក់ថា៖ «គោលនយោបាយរបស់សហរដ្ឋអាមេរិកច្បាស់លាស់ណាស់បើទោះបីជាបរិយាកាសមានការប្រឈមមុខនិងគាបសង្កត់នៅកន្លែងខ្លះៗ ក៏គោលនយោបាយរបស់យើងគឺធ្វើការជាមួយនិងឈរយ៉ាងមុតមាំដើម្បីគាំទ្រអង្គការសង្គមស៊ីវិលនៅជុំវិញពិភពលោក»។
សហរដ្ឋអាមេរិកក៏បានលើកទឹកចិត្តឱ្យស្ថានទូតរបស់ខ្លួនជួបជាមួយនឹងអង្គការសង្គមស៊ីវិលជាប្រចាំដើម្បីផ្តល់នូវការគាំទ្ររបស់សហរដ្ឋអាមេរិកនិងធានាថាពួកគេទទួលបាននូវមូលនិធិដែលចាំបាច់។ នេះបើតាមការបញ្ជាក់របស់លោកស្រីសារ៉ា ម៉េលដេលសុន៕
លោកដេវីដ ក្រាមមឺ ប្រធានអង្គការFreedom House បានថ្លែងនៅក្នុងកម្មវិធីពិភាក្សាមួយនៅរដ្ឋធានីវ៉ាស៊ីនតោនថា៖ «ចាប់ផ្តើមតាំងពីមួយទសវត្សរ៍មកហើយ របបផ្តាច់ការបានចាត់វិធានការដើម្បីរឹតត្បិត ធ្វើឱ្យចុះខ្សោយ ឬក៏បិទអង្គការសង្គមស៊ីវិលដែលពួកគេយល់ថាជាការគំរាមកំហែងដល់អំណាចផ្តាច់មុខរបស់ពួកគេ»។
ក្នុងកម្មវិធីពិភាក្សាដែលបង្ហាញពីការវាយប្រហារមកលើក្រុមសង្គមស៊ីវិលនិងការឆ្លើយតបរបស់សហរដ្ឋអាមេរិកដែលបានរៀបចំកាលពីដើមខែកញ្ញាបានបង្ហាញថាអ្នកធ្វើការឱ្យអង្គការសង្គមស៊ីវិលឬបណ្តាញព័ត៌មានត្រូវបានគេយកមកកាត់ទោសនៅ តុលាការ ឬក៏រងការប្តឹងផ្តល់ឱ្យសងសំណងជាប្រាក់រាប់លានដុល្លារជាដើម។
នៅប្រទេសរុស្ស៊ីវិញ លោក Pavel Chikov ប្រធាននៃអង្គការសិទ្ធិមនុស្សAGORA បានបញ្ជាក់ថាមានច្បាប់មួយចំនួនដែលរដ្ឋាភិបាលប្រើប្រាស់ដើម្បីបង្កើតនូវបរិយាកាសភ័យខ្លាចចំពោះសកម្មជនសិទ្ធិមនុស្សបើទោះបីជាការអនុវត្តដាក់ទោសទណ្ឌពិតប្រាកដនៅមិនទាន់មានច្រើនក៏ដោយ។ ក្នុងចំណោមនោះគឺមានច្បាប់ដែលប្រឆាំងនឹងសកម្មភាពអង្គការសង្គមស៊ីវិល ច្បាប់គ្រប់គ្រងបណ្តាញអ៊ីនធឺណិត និងការតម្រូវឱ្យអង្គការចុះឈ្មោះជាទីភ្នាក់ងារបរទេសជាដើមចំពោះអង្គការណាដែលទទួលជំនួយពីបរទេស។
«រដ្ឋាភិបាលរុស្ស៊ីព្យាយាមដាក់សម្ពាធនេះដើម្បីព្យាយាមគ្រប់គ្រងអ្នកធ្វើការសំខាន់ៗក្នុងវិស័យសិទ្ធិមនុស្សប៉ុន្តែសម្រាប់ពួកយើងយល់ថានេះពិតជាការគំរាមកំហែងមួយ»។
សម្រាប់ប្រទេសភូមាចាប់តាំងពីឆ្នាំ២០១១មកមានការបន្ធូរបន្ថយការរឹតបន្តឹងលើសកម្មភាពរបស់ពលរដ្ឋហើយឃើញមានការលេចឡើងនូវអង្គការសង្គមស៊ីវិលជាច្រើនប៉ុន្តែពួកគេនៅតែបន្តប្រឈមនឹងការគំរាមកំហែង ការបំភិតបំភ័យនិងបង្កឧបសគ្គផ្លូវច្បាប់ដដែលហើយក្រុមយោធាខ្លះបានព្យាយាមបញ្ចូលឥទ្ធិពលរបស់ពួកគេទៅក្នុងសកម្មភាពរបស់អង្គការសង្គមស៊ីវិល។
លោក Aung Maw Zin មន្ត្រីគម្រោងនៃមូលនិធិទ័យទានជាតិសម្រាប់លទ្ធិប្រជាធិបតេយ្យនៅតំបន់អាស៊ីបានបញ្ជាក់ថា៖ «ពួកយោធាខ្លះបានបង្កើតនូវមូលនិធិសប្បុរសធម៌ថ្មីៗ កាន់កាប់សារព័ត៌មានឬក៏បរិច្ចាគទឹកប្រាក់ជាច្រើនទៅឱ្យមូលនិធិមនុស្សធម៌របស់គណបក្សប្រឆាំងឬអង្គការដែលមានកេរ្តិ៍ឈ្មោះល្បីៗមួយចំនួនក្នុងគោលដៅដើម្បីបញ្ចូលឥទ្ធិពលរបស់ពួកគេលើការងាររបស់អង្គការទាំងនោះ»។
ការជួយទាំងនេះក៏ដើម្បីជាការលាងសម្អាតកេរ្តិ៍ឈ្មោះរបស់ពួកគេដើម្បីឱ្យសហរដ្ឋអាមេរិកនិងបណ្តាប្រទេសអឺរ៉ុបមួយចំនួនដកឈ្មោះចេញពីបញ្ជីខ្មៅ។
ដោយឡែកនៅប្រទេសកម្ពុជាវិញក្រុមអង្គការសង្គមស៊ីវិលបានរាយការណ៍ឱ្យដឹងពី សកម្មភាពស្រដៀងគ្នានេះដែរដោយពួកគេបន្តរងការរិះគន់ដែលធ្វើឡើងដោយអ្នកកាន់អំណាច។
លោកអ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបានបញ្ជាក់ថានៅពេលឥឡូវនេះនៅពេលដែលរដ្ឋាភិបាលថ្មីបានបង្កើតរួចទៅហើយគឺរដ្ឋាភិបាលកម្ពុជាបានឈានទៅក្រោយទម្លាប់ចាស់ដដែលក្នុងការវាយប្រហារមកលើតួរនាទីរបស់អង្គការក្រៅរដ្ឋាភិបាល។
«ក្នុងនោះមានការចោទប្រកាន់ពីភាពលម្អៀងរបស់អង្គការក្រៅរដ្ឋាភិបាលដោយសារខ្លួនរិះគន់រដ្ឋាភិបាលពីបញ្ហាសិទ្ធិមនុស្សនិងបញ្ហាបោះឆ្នោត។ អញ្ចឹងមានការចោទប្រកាន់លើរដ្ឋាភិបាលប៉ុន្តែយើងមានការព្រួយបារម្ភដែរព្រោះពីដើមមកយើងព្រួយបារម្ភពីការអនុម័តច្បាប់មួយដើម្បីរឹតបន្តឹងអង្គការក្រៅរដ្ឋាភិបាលជាពិសេសបើសិនជាច្បាប់ហ្នឹងរឹតបន្តឹងទៅលើការចូលរួមការតវ៉ានយោបាយបញ្ហាលទ្ធិប្រជាធិបតេយ្យហើយនឹង បញ្ហាសិទ្ធិមនុស្សហើយមួយទៀតគឺអាចទាក់ទងនឹងការព្រួយបារម្ភនៃការរឹតបន្តឹងនោះគឺរឿងហិរញ្ញវត្ថុដែលគាំទ្រដល់អង្គការក្រៅរដ្ឋាភិបាលផងដែរ»។
សហរដ្ឋអាមេរិកបានទទួលស្គាល់ពីការលំបាកដែលក្រុមអង្គការក្រៅរដ្ឋាភិបាលទទួលរងក្នុងការបំពេញការងាររបស់ខ្លួនហើយបានបញ្ជាក់ពីជំហរក្នុងការផ្តល់ការការពារដល់សកម្មជនសិទ្ធិមនុស្សទាំងនោះ។
លោកស្រីសារ៉ា ម៉េលដេលសុន ឧបការីរងរដ្ឋបាលនៃការិយាល័យទទួលបន្ទុកលទ្ធិប្រជាធិបតេយ្យ ជម្លោះ និងជំនួយមនុស្សធម៌របស់ទីភ្នាក់ងារជំនួយអភិវឌ្ឍន៍អន្តរជាតិរបស់សហរដ្ឋអាមេរិកដែលជាវាគ្មិនក្នុងកិច្ចពិភាក្សានោះបញ្ជាក់ថា៖ «គោលនយោបាយរបស់សហរដ្ឋអាមេរិកច្បាស់លាស់ណាស់បើទោះបីជាបរិយាកាសមានការប្រឈមមុខនិងគាបសង្កត់នៅកន្លែងខ្លះៗ ក៏គោលនយោបាយរបស់យើងគឺធ្វើការជាមួយនិងឈរយ៉ាងមុតមាំដើម្បីគាំទ្រអង្គការសង្គមស៊ីវិលនៅជុំវិញពិភពលោក»។
សហរដ្ឋអាមេរិកក៏បានលើកទឹកចិត្តឱ្យស្ថានទូតរបស់ខ្លួនជួបជាមួយនឹងអង្គការសង្គមស៊ីវិលជាប្រចាំដើម្បីផ្តល់នូវការគាំទ្ររបស់សហរដ្ឋអាមេរិកនិងធានាថាពួកគេទទួលបាននូវមូលនិធិដែលចាំបាច់។ នេះបើតាមការបញ្ជាក់របស់លោកស្រីសារ៉ា ម៉េលដេលសុន៕
